भविष्यातील यशाचा पाया महाविद्यालयीन जीवनात एनसीसी मुळेच घातला जातो- ब्रिगेडीयर अभिजीत वाळिंबे

भविष्यातील यशाचा पाया महाविद्यालयीन जीवनात एनसीसी मुळेच घातला जातो- ब्रिगेडीयर अभिजीत वाळिंबे

कराड/प्रतिनिधी: 

    आपल्या जीवनात उत्तम आणि सर्वोत्तम करण्याची भावना जागृत कराल तरच जीवन सफल होईल. सफल आयुष्याचा पाया घालण्याचे काम महाविद्यालयीन जीवनात एनसीसी करत असते. म्हणून जेव्हा सफलता मिळेल तेव्हा तुम्ही त्याचे सर्व श्रेय महाविद्यालयातील एनसीसी मध्ये व्यतित केलेल्या त्या तीन वर्षांना नक्किच द्याल.

लहान लहान गोष्टींमधून शिकण्याचा प्रयत्न करा. याच लहान लहान गोष्टी तुम्हाला यशस्वी जीवन जगण्यासाठी अप्रत्यक्षरित्या मदत करतील  असे प्रतिपादन ब्रिगेडियर अभिजीत वाळंबे यांनी एनसीसी १९ महाराष्ट्र बटालियन कॅडेट भेटी दरम्यान केले.

    ब्रिगेडियर अभिजीत वाळिंबे पुढे म्हणाले, मी सातत्याने १९ महाराष्ट्र बटालियनच्या अंतर्गत येणाऱ्या महाविद्यालयातील सर्व एनसीसी कॅडेटना कायम भेटून मार्गदर्शन करणार आहे. 

    अध्यक्षीय मनोगतात एसजीएम महाविद्यालय, कराडचे उपप्राचार्य एस.ए.पाटील म्हणाले, एनसीसी हे महाविद्यालयाचे अतिशय महत्त्वाचे अंग आहे. त्यात सहभागी विद्यार्थ्यांना महाविद्यालयाकडून शक्य तितके सहकार्य केले जाते व नेहमीच केले जाईल. एनसीसीच्या विद्यार्थ्यांनी विविध स्तरांवर आपल्या महाविद्यालयाचे आपल्या तालुक्याचे, जिल्ह्याचे, राज्याचे तसेच देशाचे नाव मोठे करावे.

        १४ फेब्रुवारी २०२३ रोजी ब्रिगेडियर अभिजीत वाळिंबे ग्रुप कमांडर, कोल्हापूर ग्रुप यांनी कराड तालुक्यातील १९ महाराष्ट्र बटालियन एनसीसी कराड अंतर्गत महाविद्यालयातील एनसीसी युनिटना सदिच्छा भेट दिली. त्यामध्ये सद्गुरु गाडगे महाराज महाविद्यालय कराड, वेणूताई चव्हाण कॉलेज कराड, शिक्षणमहर्षी बापूजी साळुंखे महाविद्यालय, कराड, यशवंतराव चव्हाण कॉलेज ऑफ सायन्स कराड, दौलतराव आहेर इंजिनिअरिंग कॉलेज कराड, कृष्णा मेडिकल कॉलेज, कराड आणि कृष्णा महाविद्यालय, रेठरे आदी महाविद्यालयांचा समावेश होता. 

    कर्नल जे.पी.सत्तिगिरी, कमांडिंग ऑफिसर, दिनेशकुमार झा अॅडम ऑफिसर, १९ महाराष्ट्र बटालियन एनसीसी कराड, शिक्षणमहर्षी बापूजी साळुंखे महाविद्यालय कराडचे प्राचार्य कॅप्टन डॉ.महेश गायकवाड यांच्या प्रमुख उपस्थितीत हा कार्यक्रम पार पडला. 

कार्यक्रमाचे प्रास्ताविक व स्वागत लेफ्टनंट संदीप महाजन ए एन ओ, १९ महाराष्ट्र बटालियन एनसीसी कराड यांनी केले. कार्यक्रमाचे आभार लेफ्टनंट डॉ. महेंद्र कदम पाटील यांनी मानले तर कार्यक्रमाचे सूत्रसंचालन डॉ. कोमल कुंदप यांनी केले.