साळुंखे महाविद्यालयात सोमवारी शिक्षणमहर्षी डॉ. बापूजी साळुंखे व्याख्यानमालेचे आयोजन

 साळुंखे महाविद्यालयात सोमवारी शिक्षणमहर्षी डॉ. बापूजी साळुंखे व्याख्यानमालेचे आयोजन 

कराड/प्रतिनिधी: शिक्षणमहर्षी डॉ.बापूजी साळुंखे व्याख्यानमाले अंतर्गत "शिक्षणातून मूल्यसंस्कार आणि समाजभान" या विषयावर शिवम प्रतिष्ठान घारेवाडीचे संस्थापक श्री. इंद्रजीत देशमुख यांचे जाहीर व्याख्यान सोमवार, दिनांक २७ मार्च रोजी सकाळी ठिक १०.०० वाजता शिक्षणमहर्षी बापूजी साळुंखे महाविद्यालय, कराड येथे होणार असल्याची माहिती प्र.प्राचार्य कॅप्टन डॉ.महेश गायकवाड यांनी प्रसिद्धी पत्रकाद्वारे माध्यमांना दिली आहे.                       

शिक्षण ही मूलभूत गरज आहेच. परंतु आज एका बाजूला विकासाच्या संकल्पनेमागे धावताना  विज्ञान तंत्रज्ञानाचा प्रभाव समाजमनावर आहे. तर  दुसऱ्या बाजूला सुशिक्षित समाज, समाजभान हरपत चालला आहे. संस्कारमूल्य विसरत चालला आहे. यातून तयार होणारा संवेदनशून्य समाज संस्कृतीला बाधा आणणारा आहे. खऱ्या अर्थाने पुन्हा एकदा कुठेतरी मूल्यसंस्कारावर गांभीर्याने चर्चा करण्याची वेळ आली आहे. म्हणूनच या व्याख्यानमालेच्या माध्यमातून मूल्यसंस्कार व समाजभान जनसामान्यांच्या मनात बीजारोपीत  करण्यासाठी तसेच शिक्षणमहर्षी डॉ.बापूजी साळुंखे यांचे कार्य व  तत्त्वज्ञान समाजापर्यंत पोहोचविण्यासाठी व त्यांच्या प्रती कृतज्ञता व्यक्त करण्याच्या उद्देशानेच ही  व्याख्यानमाला शिवाजी विद्यापीठाच्या वतीने आयोजित केली आहे.                    

सदर व्याख्यानमालेचे अध्यक्षपद श्री.स्वामी विवेकानंद शिक्षणसंस्थेचे कार्याध्यक्ष प्राचार्य अभयकुमारजी साळुंखे भूषविणार आहेत. शिवाजी विद्यापीठ, कोल्हापूर आणि शिक्षणमहर्षी बापूजी साळुंखे महाविद्यालय, कराड यांच्या संयुक्त विद्यमाने सदर व्याख्यानमालेचे आयोजन करण्यात आले आहे. 

शहरातील सर्व शाळा, महाविद्यालयातील विद्यार्थी, प्राध्यापक, ज्येष्ठ नागरिक, आजी माजी संस्था पदाधिकारी तसेच कराड नगरीतील सर्व नागरिकांना या व्याख्यानमालेचा लाभ घेण्याचे आवाहन प्र.प्राचार्य कॅप्टन डॉ. महेश गायकवाड यांनी केले आहे. व्याख्यानमालेच्या यशस्वीतेसाठी महाविद्यालयातील सर्व प्राध्यापक, सेवकवर्ग परिश्रम घेत आहेत. 

फोटो कॅप्शन: प्र.प्राचार्य कॅप्टन डॉ.महेश गायकवाड