विवेकानंद शिक्षणसंस्थेच्या संघर्षाच्या काळात उंडाळकर कुटुंबीयांची मोलाची साथ - कौस्तुभ गावडे

विवेकानंद शिक्षणसंस्थेच्या संघर्षाच्या काळात उंडाळकर कुटुंबीयांची मोलाची साथ - कौस्तुभ गावडे

कराड/ प्रतिनिधी: 

    विलासराव (काका) पाटील- उंडाळकर हे विकासाला प्राधान्य देणारं व्यक्तिमत्व होत. कराड दक्षिणेचा जो कायापालट त्यांनी केला त्यामुळेच जनता सातत्याने त्यांच्या पाठीशी उभी राहिली. त्यांनी कधीही वैयक्तिक स्वार्थ पाहिला नाही. कायमच जनसेवेला प्राधान्य दिले. विवेकानंद शिक्षणसंस्थेच्या संघर्षाच्या काळात देखील काका संस्थेच्या पाठीशी ठामपणे उभे राहिले. त्यामुळे उंडाळकर कुटुंबीयांचे ऋण शब्दात व्यक्त करता येणार नाहीत. आज काका नाहीत पण काकांचा वैचारिक वारसा उदयसिंह (दादा) पाटील मोठ्या समर्थपणे पुढे घेऊन जात आहेत असे प्रतिपादन श्री. स्वामी विवेकानंद शिक्षण संस्थेचे सी.ई.ओ कौस्तुभजी गावडे यांनी केले.                                

        बापूजी साळुंखे महाविद्यालय, कराड आयोजित राष्ट्रीय सेवा योजना विशेष श्रमसंस्कार शिबिर मौजे. कोळे, ता. कराड येथे शिबिरार्थींना मार्गदर्शन करताना ते प्रमुख पाहुणे म्हणून बोलत होते. यावेळी रयत सहकारी साखर कारखान्याचे चेअरमन अॅड. उदयसिंह (दादा) पाटील- उंडाळकर शिबिराचे उद्घाटक म्हणून उपस्थित होते. तसेच शिवाजी विद्यापीठ राष्ट्रीय सेवा योजना विभागाचे संचालक प्रा.अभय जायभाये, कराड पंचायत समितीचे  माजी उपसभापती रमेश देशमुख,  महाविद्यालयाचे प्राचार्य कॅप्टन डॉ. महेश गायकवाड तसेच मौजे कोळे गावच्या सरपंच सौ. भाग्यश्री देसाई, प्राचार्य डॉ.अरुण गाडे, प्रा. सुरेश रजपूत आदी. प्रमुख उपस्थितीत होते.

        कौस्तुभजी गावडे पूढे म्हणाले, बापूजींनी मौजे. कोळे गावात जी पुण्याई उभी केली त्याचीच प्रचिती म्हणून गावाने संस्थेच्याच बापूजी साळुंखे महाविद्यालयावर विश्वास ठेवून हे शिबिर आयोजित केले. या बाबीचा मला विशेष आनंद वाटतो. शिबिरार्थी देखील गावाने ठेवलेला विश्वास नक्कीच सार्थ करून दाखवतील अशी मला आशा आहे.

        शिबिराचे उद्घाटनपर मनोगत व्यक्त करताना अॅड. उदयसिंह (दादा) पाटील- उंडाळकर म्हणाले, स्वातंत्र्यपूर्व कालखंडात पारतंत्र्यातून मुक्ती मिळवण्यासाठी शिक्षण गरजेचे होते. लोकांना शिक्षण दिल्यानेच स्वातंत्र्य लढ्याला बळ प्राप्त होईल हे जाणणारी काही जाणकार मंडळी होती. त्यामुळे स्वातंत्र्यपूर्व   कालखंडात स्वातंत्र्यप्राप्तीसाठी व नंतरच्या काळात देशाची उभारणी करण्याच्या हेतूने जाणीवपूर्वक शिक्षणाचा प्रसार काही विभूतींनी केला. त्यात शिक्षण महर्षी डॉ. बापूजी साळुंखे यांचे नाव अग्रक्रमाने घ्यावे लागेल. बहुजन समाजापर्यंत ज्ञानकिरणे पोचवण्याचे काम स्वामी विवेकानंद शिक्षण संस्था आणि रयत शिक्षण संस्थेने केले. त्यामुळेच बहुजनांची मुले शिकू शकली. 

        शिवाजी विद्यापीठ राष्ट्रीय सेवा योजना विभागाचे संचालक प्रा. अभय जायभाये म्हणाले, आम्ही शिवाजी विद्यापीठाच्या राष्ट्रीय सेवा योजना विभागाच्या माध्यमातून संस्कारक्षम, पथदर्शी काम उभं करण्याचा सातत्याने प्रयत्न करीत आहोत. मात्र त्यामध्ये समाजातील सर्व स्तरातील लोकांनी सहभाग घेणे आवश्यक वाटते.              

    शिक्षणमहर्षी बापूजी साळुंखे महाविद्यालयाचे प्राचार्य कॅप्टन डॉ. महेश गायकवाड म्हणाले, समाजसेवा आणि देशसेवा या एकाच नाण्याच्या दोन बाजू आहेत. एन.एस.एस च्या माध्यमातून शिबिरार्थी स्वच्छतेचे काम करतात हीच खऱ्या अर्थाने देशसेवा आहे. शिबिराच्या माध्यमातून समाजसेवेचा संस्कार विद्यार्थ्यांमध्ये बिंबवण्यासाठी आम्ही सातत्याने प्रयत्नशील असतो. कोळे गावात देखील आमचे विद्यार्थी श्रमदानाच्या माध्यमातून ग्रामस्थांच्या मनात जागा निर्माण करतील अशी मी याप्रसंगी ग्वाही देतो.               

        यावेळी उपसरपंच सुधीर कांबळे, माजी उपसरपंच संतोष शिंगारे, श्रीकृष्ण पाटील, करिष्मा संदे, सुषमा देशमुख, माधुरी साळुंखे, कांताबाई पाटील मुख्याध्यापक यादव सर, काटकर सर तसेच मौजे कोळे गावचे ग्रामस्थ मोठ्या संख्येने उपस्थित होते. शिबिराच्या उद्घाटन समारंभाचे प्रास्ताविक व पाहुण्यांचा परिचय प्रा. सुभाष कांबळे यांनी करून दिला, सूत्रसंचालन प्रा. अभिजीत दळवी तर आभार प्रा. अण्णासाहेब पाटील यांनी मानले. कार्यक्रम अधिकारी प्रा. सुभाष बोलाईकर तसेच प्रा. दिपाली वाघमारे, प्रा. स्नेहल वरेकर, प्रा. संभाजी पाटील प्रा.सौ. वंदना पवार, पंकज कुंभार, हरीविवेक कुंभार यांच्यासहित सर्व राष्ट्रीय सेवा योजना सदस्यांनी कार्यक्रम यशस्वीतेसाठी प्रयत्न केले. 

फोटो कॅप्शन : 

    मौजे. कोळे ता. कराड येथे एन.एस.एस उद्घाटन प्रसंगी शिबिरार्थींना मार्गदर्शन करताना मा. कौस्तुभजी गावडे सोबत अॅड. उदयसिंह (दादा) पाटील- उंडाळकर,  प्राचार्य डॉ. महेश गायकवाड, प्रा. अभय जायभाये, सरपंच सौ भाग्यश्री देसाई आदी. मान्यवर.